MIDDELBURG. – Oostelike Provinsie se heelagter Curwin Bosch het sy en sy span se ondersteuners in die Baai met bree glimlagte na gister tweede dag van die 51ste Cravenweek-rugbytoernooi vir hoërskole hier gelaat.
Toe Bosch, vir die beslissende doelskop in sy span se sege van 26-25 oor die Blou Bulle vanaf die kantlyn aantree was dit nie vir hom ’n vreemde ervaring nie.
Hy het vroeër vanjaar ook Paul Roos Gimnasium se ondersteuners se harte gebreek toe hy met ’n doelskop in die doodsnikke aan sy skoolspan, Grey PE, ’n sege van 27-26 besorg het. “My span het voor die skop gese dat hulle by my staan of hy oor of mis is, wat ’n bietjie van die druk verlig het,” het Bosch gese.
Bosch, wat eintlik sy span se losskakel is, het boonop die drie met vlugvloetige voetwerk gaan druk, wat vroeër in die tweede helfte sy span terug in die wedstryd gebring het.
Die vleuel, Athi Mayinje, het die drie in die hoek met speeltyd reeds verstreke gaan druk, waarna Bosch die held kon wees.
Hoewel die Libloues se losskakel, Tinus de Beer, ook sy skopskoene ingepak het en 20 van sy span se punte aangeteken het, was dit nie genoeg nie.
) Die skrumskakel, Shirwin Cupido, het Vrystaters se harte warm laat klop met sy vertoning in die hoofwedstryd van van die dag teen die Leeus.
Cupido het nie net die oond skoongemaak nie, het het ook die vuur gestook in sy span se oorwinning van 33-20. Hy het deurgans vrae aan die Leeus se verdedigers om die losskrums gevra en sy diens aan die agterlyn was suiwer. Hy het egter aan die einde van die wedstryd die veld weens ’n besering verlaat.
Die Vrystaat sal hoop dat die besering nie te ernstig is nie.
Die Vrystaatse lostrio met kaptein en agtsteman, Alex Jonker, aan die spits het ook ’n leeue-aandeel in die sege gehad. Die flanke, De Wet Bezuidenhout en Victor Maruping, vorm saam met Jonker ’n gedugte kombinasie.
Die Leeus sal nie tevrede met hulle vertoning in dié kragmeting wees nie.
) Griekwas het sy grootste sege in die geskiedenis van die Cravenweek behaal toe hy Grens-platteland met 96-0 oorrompel het. Die Poubloues se losskakel, Gerco Nortjé, het met sy amper foutlose skopvertoning amper daarin geslaag om die rekord vir die meeste punte in ’n enkele wedstryd van die Cravenweek te ewenaar. Hy het 36 punte aangeteken deur twee drieë te druk en 13 van sy span se 14 drieë te verdoel. Indien hy met die ander doelskop geslaag het sou hy die rekord van 38 punte deur André Esterhuizen (Luiperds) teen Grens-platteland tydens 2011 se toernooi in Kimberley geëwenaar het.
) Die Valke se skakelpaar, Marco Janse van Vuren en Forrest Roos, het belangrike bydraes tot hulle span se sege van 30-26 oor die Boland gelewer. Die SA Skole-skrumskakel, Janse van Vuren, se drie het die uitslag beklink, terwyl Roos daar min fout met Roos se akkurate skopskoen en balverspreiding gevind kon word.
Voorlangs het die slot Hendré Stassen en kantman Juandré van der Walt ingeklim.
) Die Luiperds se buitesenter, Markus Coetzer, het sy span tot ’n klinkende sege van 53-13 oor Namibië aangevuur. Coetzer is welverdiend as speler van die wedstryd aangewys. Hy het 23 van sy span se punte aangeteken wat twee drieë ingesluit het. Hy en sy sentermaat, Stefan van Vuuren, het goed in die middelveld gekombineer.
Die Luiperds se agtsteman, Gerhard Steenekamp, het met sy kraglopies ook ’n bydrae van twee drieë gelewer.
) Vandag se bepalings is:
10:10: Zimbabwe t. Griekwa-platteland; 11:30: Limpopo Blou Bulle t. Grens; 12:50: Griffons t. OP-platteland; 14:10: Pumas t. KwaZulu-Natal; 15:30: Westelike Provinsie t. Suidwestelike Distrikte.