’n Nuwe organisasie wat sport op skoolvlak wil bevorder, gaan ’n rugbytoernooi ¬reël wat nie op enige kwotastelsel berus nie.
Prestige Jeugsport (PJS) beoog om verskillende toernooie vir talle hoofstroom-sportsoorte te organiseer.
Volgens PJS wil hy aan die jong sportlui ’n “geleentheid bied om ongeag hul kleur, ras, taal of geloof aan nasionale toernooie deel te neem”.
Die rugbytoernooi moet veral ’n geleentheid aan spelers bied wat meen die Cravenweek se teiken-stelsel kom hulle te na, maar wat ook nie aan die Bokkie-week wil deelneem nie weens sy politieke konnotasies.
SA Rugby en die Suid-Afrikaanse Skolerugby-vereniging (SASRV) het kwotas vir die nasionale rugbyweke afgestel, maar volgens hul strategiese transformasieplan is daar teikens wat steeds gehaal moet word.
Die helfte van die SA-skolespan moes verlede jaar byvoorbeeld uit spelers van kleur bestaan.
Dries van Heerden, voorsitter van PJS, het gesê hy het dié idee vir ’n “merietetoernooi” gekry nadat ’n swart seun hom gevra het hoekom hy nie Bokkie-week toe kan gaan nie.
Die Bokkie-week word deur Afrikaner Volkseie Sport (AVS) georganiseer en is slegs vir wit deelnemers. Verskeie spelers wat al daar in aksie was, het daarna hul unies se Cravenweek-spanne gehaal en party selfs die Suid-Afrikaanse Skole-span.
PJS gaan toernooie vir rugby, netbal, hokkie, gholf, atletiek en krieket aanbied. Dit sal almal as Rhino-weke bekend staan en PJS sal jaarliks aan die Red die Renoster-veldtog geld skenk.
Die vereniging wil in samewerking met die nasionale sportliggame, veral op skoolvlak, blootstelling aan dié sportsoorte gee.
Die eerste toernooi vir rugby word van 12 tot 16 Julie in Vanderbijlpark aangebied.
Jurie Roux, uitvoerende hoof van SA Rugby, het verlede jaar in ’n e-pos aan Van Heerden gesê sy organisasie steun die planne vir só ’n toernooi, maar sal sy volle steun tot ná die eerste toernooi voorbehou sodat die vlak van integrasie eers beoordeel kan word.
Van Heerden was van 1998 tot 2004 voorsitter van die SASRV.
Die organiseerder van PJS se netbaltoernooi is Di Woolley, voorsitter van Suid-Afrikaanse Skole-netbal, en dié van die kriekettoernooi Albert Morkel, pa van die Proteas Morné en Albie Morkel.
Wimpie Lodewyk, wat die atletiek sal organiseer, dien in Suid-Afrikaanse Skole-atletiek se bestuur en is verantwoordelik vir die ontwikkeling van afrigters.
