Author: slabuschagne

Met die Jubilee-liga wat vinnig einde se kant toe staan, het die afgelope week ‘n paar spanningsbelaaide kragmetings opgelewer, met bitter min wat die spanne geskei het.

Waterkloof het puik vertoon om met 36–24 oor Eldoraigne te seëvier. Die Klofies het doeltreffend gekombineer met vinnige voere en kwaai druk toegepas op die verdediging, wat Eldoraigne min ruimte gebied het om momentum te bou.

In een van die naelbytkragmetings van die week het Montana daarin geslaag om Garsfontein met 32–30 te troef. Dit was ’n titaniese stryd met elke doel wat getel het, maar Montana se deursettingsvermoë het in die doodsnikke die deurslag gegee.

Garsfontein het vergoed vir dié naelskraapse nederlaag deur vir Menlopark op ewe spannende wyse met 38–34 te verslaan. Die kombinasie van Karen Roothman (AV) en Dane Boshoff (S) op die aanval was uiters gevaarlik, met presiese voere en dinamiese beweging. Anke Janse van Rensburg (D) het met haar akkuraatheid op doel uitgeblink, terwyl Isabella le Roux (V) rotsvas was op die verdediging en in kritieke stadiums balle omgekeer het.

Uitslae:

Waterkloof 36, Eldoraigne 24
Garsfontein 38, Menlopark 34
Montana 32, Garsfontein 30

Die Jubilee-liga het vandeesweek nogmaals kragtige netbalaksie opgelewer, met spanne wat elke sentimeter van die baan benut het, asook ‘n viertal spelers wat spesiale mylpale gevier het.

Affies het teen Oos-Moot hulle spelplan noukeurig uitgevoer om met 30–24 as oorwinnaars uit die stryd te tree.

Menlopark het uiteindelik met 27–21 die oorhand oor Waterkloof verkry, in ’n kragmeting wat op akkuraatheid en kalmte berus het. Klofies het nietemin sterk teruggekom in hul volgende wedstryd teen Zwartkop, waar hulle met 35–21 geseëvier danksy ’n vertoning gevul met energie en doelgerigte spel.

Montana het vir Eldoraigne met 42–19 kafgedraf. Hierdie kragmeting was spesiaal vir Illana Botha, wat haar 50ste eerstespan-wedstryd gespeel het – ’n toonbeeld van toewyding en volharding.

Montana het daarna in ‘n taai kragmeting met Oos-Moot die knoop met 34–32 deurgehak. Nóg drie Monties het by hierdie geleentheid hul 50ste wedstryde gevier, naamlik Altje Conradi, Leah Booysen en Cathlene du Preez. Dit is inderdaad ’n besonderse prestasie in enige netbalspeler se loopbaan.

Uitslae:

Affies 30, Oos-Moot 24

Menlopark 27, Waterkloof 21

Waterkloof 35 , Zwartkop 21

Montana 42, Eldoraigne 19 (Illana Botha – 50ste wedstryd)

Montana 34, Oos-Moot 32 (Altje Conradi, Leah Booysen, Cathlene du Preez – 50ste wedstryd elk)

Met die JOMO-liga wat die pylvak inbeweeg, raak die prentjie vir kwalifikasie duideliker – en die kompetisie al hoe strawwer.

Helpmekaar het hul plek bo aan die die puntelys verstewig met twee dominante vertonings.

Hulle het eers vir Krugersdorp met 37–5 afgeransel in ’n eenrigtingstryd, en toe vir Noordheuwel met 34–20 getroef – ’n kragmeting wat verwag was om taaier te wees, maar waarin Helpies se struktuur en akkuraatheid eenvoudig té goed was vir Nories.

Met Helpmekaar nou stewig in die eerste plek, verskuif die fokus na die stryd om die tweede posisie – en dit is waar dinge werklik spannend raak.

Rand Park het ’n sterk bod ingesit met hul sege van 36–14 oor Randburg, en dit bring hulle in direkte kompetisie met Noordheuwel, wat steeds in die wedloop is maar nou ’n deurslaggewende wedstryd teen Rand Park in die gesig staar.

Intussen het Monument ‘n stelling van hul eie gemaak deur Florida met 30–12 te oorrompel – ’n oorwinning wat hul aanspraak op ’n hoër plek op die puntelys versterk, al is die top-twee dalk net-net buite bereik.

Met slegs ’n handvol wedstryde oor, is elke punt en doelsaldo van kritieke belang. Die komende kragmeting tussen Rand Park en Noordheuwel beloof om die bepalendste van die seisoen te wees.

Uitslae:

Helpmekaar 37, Krugersdorp 5

Helpmekaar 34, Noordheuwel 20

Rand Park 36, Randburg 14

Monument 30, Florida 12

Die laaste ronde wedstryde in die gewone fase  van Sedibeng-liga het weer uitsonderlike spel en indrukwekkende oorwinnings opgelewer, maar óók diep emosie – vernaam vir ‘n aantal Transvalia-spelers wat hul laaste wedstryd op tuisbodem gespeel het.

Hoërskool Transvalia het die dag oorheers met ’n wegholsege van 52-8 oor Vereeniging Gimnasium. Dié wedstryd het egter ’n dieper betekenis ingehou as bloot die telling.

Vir heelparty van Valia se senior spelers was dit hul laaste tuiswedstryd – en die emosies was tasbaar. Met elke gooi, elke doel en elke eindfluit, het die werklikheid begin insink: dit was die einde van ’n era op hul geliefde tuisbaan. Trane het gevloei, drukkies is uitgedeel en daar is opnuut besef hoekom netbal soveel meer is as bloot ’n sport.

Heidelberg Volkskool het kragte gemeet met Hoërskool Dr. Malan in ’n opwindende wedstryd waar Volkies se dinamiese spel en samewerking hulle na ’n stewige oorwinning van 37-17 geneem het. Die span se akkurate aanval en rotsvaste verdediging, met talle onderskeppings, het Dr. Malan van vroeg af onder druk geplaas.

In die derde wedstryd van die week het Hoërskool Driehoek ook oortuigend met 34-12 teen Overvaal Hoërskool geseëvier. Driehoek het van meet af aan met doelgerigte spel hul gehalte tentoongestel en aangedui dat hulle beslis nie ligtelik opgeneem kan word in die Sedibeng-liga nie.

Namate die son gesak het op die laaste ligawedstryde van die seisoen, was dit duidelik: dis nie slegs punte op die telbord wat tel nie, maar verál ook die herinneringe wat vasgevang word in elke wedstryd. Aan ál die matrieks wat vir oulaas hul skoene tuis vasgemaak het – jul passie, trots en vasberadenheid sal altyd deel van die baan bly.

Uitslae:

Volkskool 37, Dr. Malan 17

Transvalia 52, Gimnasium 8

Driehoek 34, Overvaal 12

Die Jubilee-liga het weer gesorg vir aksiebelaaide netbal, met Menlopark en Affies wat oortuigende seges behaal het, terwyl Garsfontein in ‘n klipharde stryd vir Oos-Moot getroef het.

Die Parkies het uitmuntend vertoon teen Eldoraigne om met 45–12 as oorwinnaars uit die stryd te tree. Hulle het van die eerste afgooi af die botoon gevoer met presiese aangeewerk, blitsige spel en verdediging wat die opposisie haas geen ruimte toegelaat het nie.

Affies het ‘n ewe indrukwekkende sege van 40–16 oor Waterkloof behaal, deur elke fout van die opposisie genadeloos uit te buit met hul ongenaakbare verdediging.

Dit was egter ook ’n spesiale dag vir Waterkloof, en vernaam hul kaptein en veelsy­dige ster op doel en verdediging, Zoey Smit, wat haar 150ste eerstespan-wedstryd gespeel het.

Dit is ’n merkwaardige mylpaal. As kaptein het Smit nie net haar span aangevoer met uitsonderlike leierskap nie, maar ook haar merk gelaat met besielende spel. Haar onblusbare passie, toewyding en deursettingsvermoë maak van Smit ’n ware voorbeeld vir alle jong spelers.

Garsfontein het met ’n welverdiende sege van 25–18 oor Oos-Moot hul vaardigheid en strukturele spel uitgestal. Die Garsies het deurgaans kalm maar doelgerig gespeel met hul verdediging wat waardevolle balle teruggewen het, terwyl hulle op die aanval netjies afgerond het. Oos-Moot het taai weerstand gebied, maar Garsfontein se spanwerk en akkuraatheid in die sirkel het die verskil tussen wen en verloor beteken.

Uitslae o.19A:

Garsfontein 25, Oos-Moot 18

Menlopark 45, Eldoraigne 12

Affies 40, Waterkloof 16

Die JOMO-liga in Gauteng het weer netbal van hoogstaande gehalte, ‘n paar dominante vertonings en ook ‘n skoksege opgelewer.

Die verrassing van die week was ongetwyfeld Noordheuwel se naelbytsege van 20–19 oor die magtige Monument. Die kragmeting was van meet af aan gelaai met spanning, met die spanne wat mekaar minimum beweegruimte toegelaat het op die baan.

Die Nories se koelkopbenadering in die doodsnikke het uiteindelik die deurslag gegee in ’n kragmeting wat beslis as een van die hoogtepunte van die seisoen beskou kan word.

In ’n kragmeting van totaal verskillende karakter, het Helpmekaar hul stempel afgedruk met ’n wegholsege van 57–4 oor Florida.

Helpies het van die eerste fluitjie af momentum opgebou, met vinnige oorgange, presiese spelpatrone en doeltreffende afronding. Florida kon eenvoudig nie die tempo hanteer nie en het gesukkel om enige vatplek aan die kragmeting te kry.

Rand Park het ook hul staal gewys met ‘n deeglike oorwinning van 31–19 oor Linden. Hayley Jose het uitmuntend gevaar op hulpdoel (HD) met haar dinamiese vertoning op die aanval, puik ondersteunende spel en akkuraatheid met elke doelpoging. Sy het ’n beduidende rol gespeel in Rand Park se dominante vertoning, met die span wat met georganiseerde struktuur en selfvertroue hul oorheersing bevestig het.

Uitslae o.19A:

Helpmekaar 57, Florida 4
Monument 19, Noordheuwel 20
Rand Park 31, Linden 19

Die Sedibeng-netballiga het vandeesweek nogmaals aksiebelaaide spel opgelewer, met Hoër Volkskool Heidelberg wat ‘n dramatiese sege behaal het oor Transvalia in een van die spannendste kragmetings van die seisoen.

Valia het volstoom afgeskop om blitsig ‘n taamlike voorsprong op te bou, maar Volkies het hope karakter in die laaste paar minute tentoongestel. Met groot vasberadenheid en puik spanwerk het hulle stelselmatig die agterstand uitgewis om uiteindelik met ‘n naelskraapse oorwinning van 30–27 uit die stryd te tree.

Met dié spogsege het Volkskool hul reputasie as een van die top-skole in die distrik en ‘n sterk aanspraakmaker op die liga-titel gestand gedoen. Transvalia kan nietemin trots wees op hulle vertoning; hulle het self karakter gewys en is beslis ‘n span wat nie ligtelik opgevat kan word nie.

Elders het Driehoek hul oorheersing bevestig met ‘n oortuigende sege van 36–17 oor Vereeniging Gimnasium. Leani Collins het op senter uitgeblink met haar flink balverspreiding en rotsvaste verdedigingswerk, en was goed ondersteun deur die dinamiese Corien Barnard, wat saam met Collins die tempo van die spel bepaal het.

Dr. Malan het Overvaal met 57–9 oorrompel in ‘n eenrigtingstryd. Overvaal sukkel steeds om hul voete te vind in die kompetisie, terwyl Dr. Malan se afrigting, struktuur en afronding duidelik op ‘n hoër vlak is.

Uitslae o.19A:

Transvalia 27, Volkskool 30
Driehoek 36, Gimnasium 17
Dr. Malan 57, Overvaal 9

Die Jubilee-netballiga het behoorlik momentum opgetel met ‘n reeks uiters mededingende kragmetings tussen van Pretoria se voorste hoërskoolspanne.

Hoërskool Garsfontein het in hul drie wedstryde tot dusver hul regmatige hoeveelheid uitdagings ervaar, maar met besliste veerkragtigheid teruggeveg om hulself as ‘n sterk aanspraakmaker in die liga te vestig.

Garsies het reeds in hul openingswedstryd van die liga teen Afrikaanse Hoër Meisieskool Pretoria ‘n tamaaie konfrontasie in die gesig gestaar. Affies, wat bekend is vir hul gestruktureerde spel en presiese afronding, het oplaas die oorhand verkry met 33–27, maar Garsies was deurgaans kompeterend en het hul teenstanders vir elke punt laat sweet.

Garsies het boonop vinnig herstel en met groot durf vir Hoërskool Zwartkop die stryd aangesê. Vasberade verdediging en die flink vermoë om verdediging in aanval te omskep, het hulle in staat gestel om met 26–17 terug te keer na die wenpad. Die span het duidelik die lesse uit hul vorige wedstryd ter harte geneem en hul spelplan doeltreffend aangepas.

Teen Hoërskool Waterkloof het Garsies se karakter en spanwerk uitgetroon. Die spel was vinnig en vurig, maar Garsies het stelselmatig beheer geneem in die tweede helfte om uiteindelik met 37–29 te seëvier. Met hierdie spogsege het hulle hul aanspraak op ‘n plek in die uitspeelrondes aansienlik versterk.

Uitslae o.19A:

AHMP 33, Garsfontein 27

Garsfontein 26, Zwartkop 17

Garsfontein 37, Waterkloof 29

Die o.19A-span van Noordheuwel het hul stempel deeglik afgedruk in die JOMO-liga in Johannesburg met ‘n reeks indrukwekkende oorwinnings.

Met dominante vertonings teen Randburg, Florida, Krugersdorp en Linden het Noordheuwel aangedui dat hulle nie net tegnies vaardig is nie, maar ook as ‘n sterk spaneenheid funksioneer. In ál vier hul wedstryde het hulle gemaklik geseëvier, met vernaam die wegholseges oor Florida (44-9) en Krugersdorp (43-17) wat uitstaan.

Helpmekaar het eweneens beïndruk en gewys waarom hulle tradisioneel as een van die topskole in Johannesburg beskou word, met kragvertonings teen Randburg (32-11) en Monument (32-22).

Rand Park het ook ‘n paar goeie oomblikke beleef, insluitende ‘n naelskraapse oorwinning van 25-24 oor Monument en oortuigende sege van 32-16 oor Florida. Dié resultate dui op potensiaal, hoewel konsekwentheid ‘n aspek is wat nóg aandag verg.

Randburg die afgelope ruk gesukkel om momentum te bou en in die proses ‘n aantal nederlae gely, insluitende teen Noordheuwel, Helpmekaar en Monument. Florida het ook moeite ondervind om ritme te kry en ál vier hul wedstryde verloor. Krugersdorp en Linden het gemengde welslae behaal, met ‘n enkele sege elk.

Uitslae (o.19A):
Noordheuwel 37, Randburg 15
Florida 22, Krugersdorp 23
Rand Park 25, Monument 24
Florida 18, Linden 22
Helpmekaar 32, Randburg 11
Krugersdorp 17, Noordheuwel 43
Randburg 9, Monument 35
Noordheuwel 44, Florida 9
Monument 22, Helpmekaar 32
Noordheuwel 33, Linden 16
Florida 16, Rand Park 32
Randburg 21, Krugersdorp 25

Twee bepalings in die Sedibeng-liga is onlangs afgehandel toe Heidelberg Volkskool teen Hoërskool Driehoek te staan gekom en Dr Malan met Hoërskool Transvalia kragte gemeet het.

Heidelberg Volkies het hul besoek aan Driehoek met groot selfvertroue aangepak en verskeie oorwinnings regdeur die ouderdomsgroepe behaal. Hul spanne het deur die bank beïndruk met hul samespel en afronding op die baan.

Die o.19A- en o.17A-span het altwee oortuigende oorwinnings behaal, met die eerstes wat met 32-11 geseëvier het. Driehoek het wel in die o.14A-afdeling daarin geslaag om met 11-11 gelykop te speel, wat hul veerkragtigheid en veggees tentoongestel het.

Die wedstryde tussen Transvalia en Dr Malan het ook vir hope opwinding gesorg. Die eerstes was in ‘n nek-aan-nek-stryd gewikkel wat uiteindelik met 28–28 gelykop geëindig het.

Transvalia het die botoon gevoer in die o.17A- en o.16A-afdeling, terwyl Dokkies met puik strategiese spel die oorhand in die o.15A- en o.14A-wedstryd bewerkstellig het.

Uitslae:

HS Driehoek vs Heidelberg Volkskool (24 April 2025)
o.19A: Driehoek 11, Heidelberg Volkskool 32
o.17A: Driehoek 6, Heidelberg Volkskool 35
o.16A: Driehoek 12, Heidelberg Volkskool 27
o.15A: Driehoek 15, Heidelberg Volkskool 23
o.14A: Driehoek 11, Heidelberg Volkskool 11

HS Transvalia vs HS Dr Malan (6 Mei 2025)
o.19A: Transvalia 28, Dr Malan 28
o.17A: Transvalia 25, Dr Malan 12
o.16A: Transvalia 27, Dr Malan 11
o.15A: Transvalia 12, Dr Malan 25
o.14A: Transvalia 13, Dr Malan 22