Vir die derde keer op ‘n streep moes Paarl Gimnasium se eerste rugbyspan ‘n galpil in die grootste Premier Interskole-wedstryd ter wêreld sluk.
Die Hoër Jongenskool Paarl het sy skrikbewind op Suid-Afrikaanse bodem voortgesit deur Paarl Gimnasium met 18-13 in die Faurestraat-stadion te klop. Boishaai sluit daarmee vir die derde agtereenvolgende jaar sy seisoen op Suid-Afrikaanse bodem onoorwonne af. Die span het laas in 2014 teen Marlow Landbou teen ‘n Suid-Afrikaanse span die knie gebuig.
Boishaai het wel vanjaar in Nieu-Seeland teen Christchurch Boys’ High met (36-38) die knie gebuig.
Gimmies oftewel die Bloedworse het dit egter nie maklik vir Boishaai gemaak nie. Die span se agttal met sy slot Adriaan Ludick, flank Corné Uys en haker, Chris Rossouw het die fisieke stryd na Boishaai geneem.
Die wenspan het beslis sy kaptein en agtsteman, Francke Horn, asook die losvoorspeler Evan Roos se fisieke spel voorlangs gemis. Die baljagter, Vian Fourie, het egter gewys waarom hy in die SA Skole-span opgeneem is.
Die eerste helfte het aan Gimmies behoort, maar kon slegs ‘n skrale voorsprong van 10-8 teen rustyd daarvoor wys.
Sy kaptein en heelagter, Muller du Plessis, het na ‘n paar sukkel-vertonings tydens die Cravenweek gewys hoekom hy so hoog geag word. Hy het ‘n hele paar keer Boishaai se verdediging oopgeklief.
Die proefneming om die vleuel Hanco Hanekom op skrumskakel in te span het nie vir die verloorspan uitgewerk nie. Dit was nie Hanekom se skuld nie, maar dit was duidelik dat hy nie die oond so seepglad skoon kon maak soos verlang nie.
Vir Boishaai het die haker, Cullen van der Merwe, losskakel Abner van Reenen en agtsteman, Cornell Kotze, ook goed vertoon.
In die Virsekerbeker vir Makroskole het Kempton Park ‘n naelskraapse sege van 20-19 oor Eldoraigne behaal om ‘n afspraak met die verdedigende kampioen, Garsfontein, in die kwarteindronde te maak.
Kempies se binnesenter, Ruben Fullard, het waarskynlik met ‘n reuse strafdoel aan die einde van die eerste helfte die sege vir sy span beklink. Fullard het met ‘n strafdoel van meer as 60 meter geslaag om sy span se neus met 8-7 voor met die omdraaislag te kry.
In die enigste ander Makroskole-uitspeelwedstryd het Centurion vir Marais Viljoen met 22-12 die loef afgesteek. Centurion sal in die kwarteindronde nou teen EG Jansen van Boksburg te staan kom.
In die afdeling vir Grootskole het Helpmekaar-kollege en Transvalia ‘n duidelike waarskuwing aan die ander spanne gestuur dat hulle vanjaar die twee spanne is om te klop.
Transvalia se vleuel Xander van der Walt het vyf keer die doellyn in sy span se sege van 82-0 oor die Hoërskool Tuine oorgesteek. Van der Walt het boonop drie doelskoppe oorgesklits vir ‘n persoonlike bydrae van 31 punte.
Helpmekaar mik vanjaar na sy derde agtereenvolgende titel en het sy teenstander in verlede jaar se eindstryd, Hoërskool Lichtenburg, met 89-28 kaf gedraf.
Helpies het 14 drieë ingeryg waarvan sy linkervleuel, Zack Boonzaaier, drie gedruk het. Boonzaaier het uitstekend vertoon en al drie sy drieë het na mooi lopies deur hom gekom.
Die span se buitesenter, Brandon Keevy, het 23 punte aangeteken met twee drieë, vyf doelskoppe en ‘n strafdoel. Keevy het sy kans in die eerstespan met albei hande aangegryp na albei Helpies se eerstekeuse senters die wedstryd weens siekte misgeloop het. Die span van die Goustad se SA Skole-flank, Mark Snyman, moes op binnesenter diens doen.
In Bloemfontein was dit van die begin af duidelik dat Grey-kollege ietwat omgekrap is. Grey het sy naamgenoot van Port Elizabeth, Grey High School, sy grootste loesing nog in ‘n wedstryd tussen die twee spanne met 73-10 toegedien.
Die tuisspan se dubbeldoor SA Skole-speler, Christopher Schreuder, het 23 van sy span se punte aangeteken. Hy het ‘n drie gedruk, met ses doelskoppe geslaag en ook twee strafdoele tussen deur die pale gejaag.
Die haastige vleuel, Janco van Heyningen, het drie van sy span se elf drieë gedruk.
In die Vrystaatse A-liga sal Jim Fouché en Louis Botha mekaar in die eindstryd pak. JF het sy plek in die eindstryd met ‘n oortuigende sege van 56-22 oor Sentraal bespreek. Louis Botha moes in die ander halfeindstryd so bietjie harder werk vir sy oorwinning van 33-22 oor Fichardtpark.
Die Kwaggas van Outeniqua het in die tweede helfte van sy sege van 36-15 oor Framesby in Port Elizabeth sy beste rugby van die seisoen opgedis. Dit was veral die heelagter, Darren Fortuin, en agtsteman, Andreas Breytenbach, wat op hul stukke was. Die skrumskakel, Sylvester Hassien, en vaskopstut, Conrad Ackermann, het ook blink vertonings gelewer.
Oakdale Landbou het sy jaarlikse interskole in Cradock teen Marlow Landbou se Wolramme met 47-31 gewen. Die besoekers het puik in die eerste helfte vertoon en ‘n voorsprong van 32-10 teen die omdraaislag geniet.
In Welkom is Welkom Gimnasium steeds die voorste span. Gimmies het sy jaarlikse Classic Clash teen Goudveld-Hoërskool met 49-10 gerieflik as oorwinnaars van die veld gestap.
Al die uitslae:
VRYSTAAT
Grey-kollege 73, Grey High School 10; Welkom Gimnasium 49, Goudveld-Hoërskool 10; AHS Kroonstad 70, HTS Sasolburg 0; Witteberg 40, Wilgerivier 10. Vrystaat A-liga halfeindstryde – Louis Botha 33, Fichardtpark 22; Jim Fouché 56, Sentraal 22. Platteland Halfeindstryde – Ficksburg 51, Hennenman 10; Riebeeckstad 67, Vrede 22; Hoopstad 66, New Horizon 5.
OOS-KAAP/KWAZULU-NATAL
St Andrew’s College 40, Dale College 17; Queen’s College 22, Selborne College 16; Hangklip 17, Burgersdorp 16.
NOORDVAAL
King Edward VII 45, Jeppe High School for Boys’ 10.
VIRSEKERBEKER UITSPEELWEDSTRYDE
Makroskole: Kempton Park 20, Eldoraigne 10; Centurion 22, Marais Viljoen 12.
Grootskole: Helpmekaar 89, Lichtenburg 28; Potchefstroom Gimnasium 45, Ben Vorster 27; Frikkie Meyer 60, Ermelo 15; Transvalia 82, Hoërskool Tuine 0.
Mediumskole: Trinityhouse 40, Vryburg 13; Hans Strijdom 29, Volksrust 5; Stoffberg 32, Pretoria THS 21; Bergsig 30, Ben Viljoen 21.
Middelskole: Schweizer-Reneke 32, Eric Louw 21; Frans du Toit 48, Kriel 5.
WES-KAAP
Hoër Jongenskool Paarl 18, Paarl Gimnasium 13; Oakdale Landbou 47, Marlow Landbou 31; Outeniqua 36, Framesby 15; Stellenberg 24, HTS Drostdy 19; Boland Landbou 48, Bishops 14; Paul Roos Gimnasium 31, Wynberg Boys’ High 7; Rondebosch Boys’ High 58, Durbanville 10; Tygerberg 24, Swartland 8; SACS 55, Strand 8; Worcester Gimnasium 20, Parel Vallei 17; Hoërskool Bellville 47, De Kuilen 7; HTS Bellville 27, Monumentpark 0; Charlie Hofmeyr 26, Hermanus 21; Brackenfell 33, Hugenote 31.
The first XV of the Afrikaans Hoër Seunskool of Pretoria welcomed a few stalwarts back in their midst and managed to kick-off their third term with a handsome 40-25 victory over Maritzburg College in their annual Premier Interschools derby in Pretoria.
Die Buffels van Ben Vorster sal vandag steeds langtrane huil, maar kan dalk die laaste lag na sy nederlaag van 19-17 teen Frikkie Meyer van Thabazimbi in die eindstryd van Limpopo se Grootskole-liga.